Kaffitár

Umbúðir og mörkun

Umbúðir Kaffitárs fengu yfirhalningu árið 2018. Laufey hjá Konsept stýrði verkefninu í nánu samstarfi við starfsfólk Kaffitárs, sem lagði ástríðu sína og sérfræðiþekkingu í verkefnið. Má þar nefna Aðalheiði, stofnanda Kaffitárs, Sólrúnu Björk, sölu- og markaðsstjóra, Björn, framleiðslustjóra, og Ragnheiði, brennslumeistara.

Kaffitár framleiðir fjölbreytt úrval kaffitegunda og er framboðið mismunandi eftir verslunum og árstíðum. Því var einnig markmiðið að vekja meiri athygli á þessu glæsilega úrvali, gera frumskóg kaffinördsins aðgengilegri fyrir byrjendur og lengra komna og auðvelda viðskiptavinum að finna Kaffitárskaffi við sitt hæfi allt árið um kring.

Allar kaffitegundir Kaffitárs voru metnar út frá bragðtónum, ávexti, brennslu, fyllingu, og þannig flokkaðar í fjóra litaflokka eftir bragðupplifun. Litakerfið auðveldar kaffiunnendum að velja kaffi við sitt hæfi. Þannig getur hver sá sem kann að meta ákveðna tegund af kaffi prófað nýjar tegundir í sama lit og verið nokkuð viss um að þær falli í kramið.

Verkefnið leiddi meðal annars af sér nýjar umbúðir með litakerfi, unnar í samstarfi við Farva, Kaffitárs-bragðkortið og Kaffitárspróf á netinu sem auðveldar viðskiptavinum að finna uppáhaldskaffið sitt.

Laufey Jónsdóttir hjá Konsept hefur sinnt listrænni stjórnun fyrir Kaffitár frá árinu 2016 og unnið fyrir þau fjölmörg hönnunarverkefni af ýmsum stærðargráðum.